Føroyar draga útisetar til sín sum ongantíð áður. Stórur partur av útisetunum velja at búseta seg í høvuðsstaðnum. Tí bjóðar Tórshavnar kommuna saman við Hugskotinum og Føroyingafelagnum í Aalborg til eitt spennandi kvøld um møguleikarnar hjá útisetum í Tórshavnar kommunu.

Á tiltakinum í Aalborg 1. mars fer borgarstjórin í Tórshavnar kommunu, Annika Olsen, at leggja fram um jaligu gongdina í høvuðsstaðnum. Sóley Heradóttir Hammer, umsitari í Hugskotinum, fer at greiða frá vaksandi huganum og dirvinum hjá føroyingum at skapa sítt egna starv.

Eisini fara tveir íverksetarar at siga frá teirra verkætlanum. Annar teirra, Sverre Nolsøe, fer út í heim við hugskotinum SafeFriend, og hin, Tummas við Skipá, ætlar at taka kappingina upp á fjarskiftisøkinum við nýggja telefonfelagnum TOSA.

Hetta kvøldið í Aalborg fáa forvitnir útisetar eisini høvið at hoyra leiðarar í Tórshavnar kommunu greiða frá um fjølbroyttu møguleikarnar í eini kommunu, sum hevur sett talgilding ovarlaga á breddan. Lars Larsen Black, leiðari á KT-deildini, fer at tosa um arbeiðið at talgilda høvuðsstaðin, og so fara Marius Muller, tekniskur stjóri, og Naina Túgvustein, dygdarmennari í Heilsu- og umsorganartænastuni, og vísa á, hvussu Tórshavnar kommuna kann gerast komandi arbeiðsplássið hjá útisetunum.

Tónleikur verður eisini á skránni, og so verður eisini netverkað, og Tórshavnar kommuna bjóðar ein heimligan bita.

Avmarkað pláss er til tiltakið, og tí verða áhugað biðin um at boða frá luttøku á torskvold@torshavn.fo – viðmerkið “Tórskvøld í Aalborg” umframt tal á luttakarum.

Hvar: Kayerødsgade 43, Aalborg
Nær: Fríggjadagin 1. mars 2019 kl.19